Sire cuens, j'ai vielé
Devant vous en vostre ostel,
Si ne m'avez rien doné
Ne mes gages aquité: c'est vilainie !
Foi que doi sainte Marie,
Ainsi ne vous suivrai mie.
M'aumosniere est mal garnie
Et ma bourse mal farsie.
Sire cuens, car comandez
De moi vostre volenté.
Sire, s'il vous vient à gré,
Un beau don car me donez par courtoisie !
Car talent ai, n'en doutez mie,
De raler à ma mesnie.
Quant j'i vois bourse desgarnie,
Ma feme ne me rit mie.
Ainz me dit. "Sire Engelé,
En quel terre avez esté,
Qui n'avez rien conquesté?
Trop vous êtes déporté
Aval la ville.
Vez com vostre male plie !
Ele est bien de vent farsie.
Honis soit qui a envie
D'estre en vostre compagnie !"
Quant je rentre à mon ostel
Ma feme a regardé
Derrier moi le sac enflé,
Et je qui sui bien paré
De robe grise,
Sachiez qu'ele a tost jus mise
La quenoille sans faintise;
Ele me rit par franchise,
Ses deus bras au col me lie.
Ma feme va destrousser
Ma male sans demorer;
Mon garçon va abuvrer
Mon cheval et conreer;
Ma pucele va tuer
Deus chapons pour deporter
A la janse alie;
Ma fille m'aporte une pigne
En sa main par cortoisie.
Lors sui de mon ostel sire
A moult grant joie sans ire
Plus que nuls ne porroit dire.